Skeireins

I:a …. “(nist) saei fraþjai aiþþau sokjai guþ: allai uswandidedun:samana unbrukjai waurþun:”Jah ju uf dauþaus atdrusun stauai:in-uh þis qam gamains allaize nasjands: allaize frawaurhtins afhrainjan: ni ibna nih galeiks unsarai garaihtein: ak silba garaihtei wisands:Ei gasaljands sik faur uns: “hunsl jas sauþ guda:” þizos manasedais gawaurhtedi uslunein: þata nu gasaihwands Iohannes þo sei ustauhana habaida
I:b wairþan fram fraujin garehsn miþ sunjai qaþ: “sai sa ist wiþrus gudis. saei afnimiþ frawaurht þizos manasedais:” mahtedi sweþauh jah inu mans leik. waldufnja þataine gudiskamma. galausjan allans us diabulaus anamahtai: akei was kunnands þatei swaleikamma waldufnja mahtais seinaizos nauþs ustaiknida wesi: jan ni þanaseiþs fastaida garaihteins garehsns:Ak nauþai gawaurhtedi manne ganist:jabai auk diabulau fram anastodeinai nih nauþjandin ak uslutondin
I:c mannan: jah þairh liugn gahwatjandin ufargaggan anabusn:Þatuh wesi wiþra þata gadob: ei frauja. qimands mahtai gudiskai: jah waldufnja þana galausidedi:Jah nauþai du gagudein gawandidedi:nei auk þuhtedi þau in garaihteins gaaggwein ufargaggan:Þo faura ju us anastodeinai garaidon garehsn: gadob nu was mais þans swesamma wiljin ufhausjandans dia bulau: du ufargaggan anabusn gudis: þanzuh aftra swesamma wiljin ga qissans wairþan nasjandis lai-
I:d seinai: jah frakunnan unselein þis faurþis uslutondins ins:Iþ sunjos kunþi du aftraanastodeinai þize in guda usmete gasatjan:In-uh þis nu jah leik mans andnam: ei laisareis uns wairþai þizos du guda garaihteins: swa auk skulda du galeikon seinai frodein:Jah mans aftra galaþon waurdam jah waurstwam jah spilla wairþan aiwaggeljons usmete: iþ in þizei nu witodis gaaggwei ni þatain gawandeins …

II:a …. (sei)nai galaubeinai wairþands ju faur ina balþeiþ: In mela raihtis þulainais leik is afar þulain swikunþaba miþ Ioseba usfilhands:Ga swikunþjands ei ni afwandida sik in fauramaþlje hwotos: in-uh þis jah nasjands nauh miþþan anastodjands ustaiknida þana iupa briggandan in þiudangardjai gudis wig qiþands:”Amen amen qiþa þus. niba saei gabairada iupaþro: ni mag gasaihwan þiudangardja gudis:” “iupaþ-
II:b ro” þan qaþ þo weihon jah himinakundon gabaurþ. anþara þairh þwahl* usþulan: þammuh þan ni froþ Nekaudemus: in þis ei miþþan frumist hausida fram laisarja. in-uh þis qaþ:”hwaiwa mahts ist manna gabairan alþeis wisands: ibai mag in wamba aiþeins seinaizos aftra galeiþan jag gabairaidau:” sah Unkunnands auk nauh wisands jah ni kunnands biuhti: jah þo leikeinon us wambai munands gabaurþ in tweifl atdraus:In-uh þis qaþ: “hwaiwa
II:c mahts ist manna alþeis wisands gabairan: ibai mag in wamba aiþeins seinaizos aftra galeiþan jah gabairaidau:” Iþ nasjands þana ana wairþan dom is gasaihwands. jah þatei in galaubeinai þeihan habaida: Gaskeirjands imma swe miþþan unkunnandin qiþands: “amen amen qiþa þus. niba saei gabairada us watin jah ahmin ni mag inngaleiþan in þiudangardja gudis:” naudiþaurfts auk was:Jah gadob wistai du garehsn dau-
II:d peinais andniman: at raihtis mann us missaleikom wistim us satidamma: Us saiwalai raihtis jah leika: jah anþar þize anasiun wisando: anþar-uh þan ahmein:Duþþe gatemiba and þana þize laist. jah twos. ganamnida waihts: swesa bajoþum du daupeinais garehsnai. jah þata raihtis anasiunjo wato(:)Jah þana andaþahtan ahman: ei raihtis þata gasaihwano …

III:a “…. (ma)naga wesun jainar: þaruh qemun jah daupidai wesun: ni nauhþanuh galagiþs was in karkarai Iohannes:” þatuh þan qiþands aiwaggelista ataugida:Ei so garehsns bi ina nehwa andja was: þairh Herodes birunain:Akei faur þata at bajoþum daupjandam: jah ainhwaþarammeh seina anafilhandam daupein: miþ sis misso sik andrunnun: sumai ni kunnandans hwaþar skuldedi maiza: “þaþroh þan warþ sokeins
III:b us siponjam Iohannes miþ Iudaium bi swiknein:”In þizei ju jah leikis hraineino inmaidiþs was sidus: jah so bi guþ. hrainei anabudana was: ni þanaseiþs judaiwiskom:Ufarranneinim jah sinteinom daupeinim brukjan usdaudjaina: ak Iohanne hausjandans þamma faurrinnandin aiwaggel jon:Was-uh þan jah frauja. þo ahmeinon anafilhands daupein eiþan ga raihtaba warþ bi swiknein sokeins gawagida:Unte witoþ þize unfaur weisane missadede ainaizos
III:c witoþ raidida: azgon kalbons gabrannidaizos utana bibaurgeinais: Afar-uh þan þo in wato wairpandans hrain: jah hwssopon jah wullai rau dai ufartrusnjandans: swaswe gadob þans ufar miton munandane:Iþ Iohannes idreigos daupein merida: jah missadede aflet þaim ainfalþaba gawandjandam gahaihait:Iþ fraujins. at afleta frawaurhte jah fragift weihis ahmins: jah fragibands im þatei sunjus þiudangardjos wairþaina:
III:d Swaei sijai daupeins Iohannes ana midumai twaddje ligandei. ufar þeihandei raihtis witodis hrainein: iþ minnizei filaus aiwaggeljons dau peinai: in-uh þis bairhtaba uns laiseiþ qiþands:”Aþþan ik in watin izwis daupja: iþ sa afar mis gagganda. swinþoza mis ist þizei ik ni im wairþs ei anahne(i)wands: andbindau skaudaraip skohis is: sah þan izwis daupeiþ in ahmin weihamma:”Bi garehsnai nu ….

IV:a “So nu faheþs meina usfullnoda:jains skal wahsjan iþ ik minznan:” Eiþan nu siponjam seinaim þaim bi swiknein du Judaium sokjandam jah qiþandam sis: “rabbei saei was miþ þus hindar Jaurdanau: þammei þu weitwodides: Sai sa daupeiþ jah allai gaggand du imma:” nauh unkun nandans þo bi nasjand: in-uh þis laiseiþ ins qiþands:”Jains skal wahsjan iþ ik minznan:”Aþþan so bi ina garehsns du leiti-
IV:b lamma mela raihtis bruks was. jah fauramanwjandei saiwalos þize daupidane: Fralailot aiwaggeljons mereinai: iþ fraujins: laiseins ana stodjandei af Iudaia jah und allana midjungard gaþaih and hwarjanoh* þeihandei und hita nu:Jah aukandei all manne du gudis. kunþja tiuhan dei: in-uh þis jah skeirs wisandei mikilduþs jai fin fraujins. wulþaus kannida qiþands:”Sa iupaþro qimands ufaro allaim ist:”ni þatei ufaro wisandan sware kannidedi: ak jah swalauda is mikil-
IV:c duþais maht insok. jah himinakundana: jah iupaþro qumanana qiþands: Iþ sik airþakundana: jah us airþai rodjandan: in þizei wistai manna was: jaþþe weihs jaþþe praufetus wisands: jag garaihtein weitwodjands: akei us airþai was jah us waurdahai wistai rodjands: Iþ “sa us himina qumana:” jabai in leika wisan þuhta: akei “ufaro allaim ist. jah þatei gasahw jag gahausida þata weitwodeiþ:jah þo weitwodida is ni ainshun nimiþ:”Jah þauhjabai us air
IV:d himina ana airþai in manne garehsnais qam: akei ni þe haldis air þeins was nih us airþai rodjands:Ak himinakunda anafilhands fulhsnja þoei gasahw. jag gahausida at attin:Þo nu insakana wesun fram Iohanne ni in þis þatainei ei fraujins. mikilein gakannidedi: ak du gatarhjan jah gasakan þo afgudon haifst: Sabailliaus jah Markailliaus: þaiei ainana anananþidedun qiþan attan jah sunu: iþ anþar weiha. …

V:a …. ma du attin sweriþos at allamma waurstwe ainaizos anabusnais beidiþ: iþ þatei raihtis þana frijondan: anþaran–uh þan þana frijodan: anþarana taiknjandan:(A)nþaran–uh þan galeikondan jainis waurst wam:(Þ)atuh þan insok kunnands þize anawairþane airzein: ei galaisjai na sik bi þamma twa andwairþja attins jah sunaus andhaitan: jah nu miþqiþaina: and -uh þana laist skeiris bruk-
V:b jands waurdis qaþ:”Swaswe auk atta urraiseiþ dauþans jah liban gataujiþ:swa jah sunus þanzei wili liban gataujiþ:” ei swesamma wiljin jah swesai mahtai galeikonds þamma faurþis gaqiujandin dauþans: gahaitands þize ungalaubjandane þrasabalþein andbeitands gasok: “nih þan atta ni stojiþ ainohun. ak staua alla atgaf sunau:” Iþ nu ains jah sa sama wesi bi Sabailliaus insahtai: missaleikaim bandwiþs namnam: hwaiwa stojan jah ni sto-
V:c jan: sa sama mahtedi: ni auk þatainei namne inmaideins twaddje andwairþje anþarleikein bandweiþ: ak filaus mais waurstwis ustaik neins:Anþarana raihtis ni ainnohun stojandan. ak fragibandan sunau stauos waldufni: jah is andnimands bi attin þo sweriþa: Jah alla staua bi jainis wiljin taujands:”Ei allai sweraina sunu swaswe swerand attan:” skulum nu allai weis at swaleikai jah swa bairhtai insahtai. guda unbaura namma andsaljan sweriþa(:)
V:d Jah ainabaura sunau gudis. guþ. wisan gakunnan: eiþan galaubjandans sweriþa ju hwaþarammeh* usgibaima bi wairþidai unte þata qiþano(:)”Ei allai sweraina sunu swaswe swerand attan:” ni ibnon ak galeika sweriþa usgiban uns laiseiþ:Jah silba nasjands bi siponjans bidjands du attin qaþ: “ei frijos ins swaswe frijos mik:”Ni ibnaleika fri jaþwa ak galeika þairh þata ustaikneiþ: þammuh samin haida(u)

VI:a …. nands unswikunþozei warþ bi nauþai jainis insahts swe silba is qiþiþ: “jains skal wahsjan iþ ik minznan:” in þizei nu du leitilai hweilai galaubjan: Iohanne hausjan þuhtedun: Iþ afar ni filu ufarmaudein þo bi ina atgebun: eiþan waila ins maudeiþ qiþands:”Jains was lukarn brinnando jah liuhtjando iþ jus wildeduþ swignjan du hweilai in liuhada is: Aþþan ik haba weitwodiþa maizein þamma Iohan-
VI:b ne þo auk waurstwa þoei atgaf mis atta ei ik taujau þo: þo waurs twa þoei ik tauja weitwodjand bi mik: þatei atta mik insandida:” jains auk manniskaim waurdam weitwodjands: tweifljan þuhta: Sunjeins wisands þaim unkunnandam mahta: iþ attins þairh meina waurstwa weitwodei: alla ufar insaht manniskodaus Iohannes: Unandsok izwis undredan mag kunþi:unte hwarjatoh waurde at mannam innuman maht ist: anþarleikein inmaidjan: Iþ þo weihona waurstwa
VI:c unandsakana wisandona: gaswikunþjandona þis waurkjandins dom: bairhtaba gabandwjandona þatei fram attin insandiþs was us himina: in- uh þis qiþiþ: “jah saei sandida mik atta: sah weitwodeiþ bi mik:” aþþan missaleiks jah in missaleikaim melam: Attins bi ina warþ weitwodeins: suman þairh praufete waurda: suman-uh þan þairh stibna us himina: suman-uh þan þairh taiknins: iþ in þizei þaim swa waurþanam:Hardizo þizei+ ungalaubjandane warþ
VI:d hairto: in-uh þis garaihtaba anaaiauk qiþands:”Nih stibna is hwanhun gahausideduþ nih siun is gasehwuþ jah waurd is ni habaiþ wisando in izwis: þande þanei insandida jains: þammuh jus ni galaubeiþ:” Unte at þaim gahwairbam frakunnan ni skuld ist: Iþ sumai jah stibna is gahausi dedun: sumai þan is siun sehwun: “Audagai” auk þan qaþ. “þai hrain jahairtans. unte þai guþ. gasaihwand:” jah ju þaþro swe wadi þairh …